RMN Laoag — Inbida ti Future Rice Farm manipud iti Philippine Rice Research Institute ti baro a technolohiya a Drone Farming idiay San Nicolas.
Ti Drone Farming ket saan laeng a pagpasuyot iti abuno, no di ket mausar pay a pangmonitor iti ra-ep a pagay ken dadduma pay a klase ti maimula kadagiti kataltalunan kasta pay iti agibunobon iti bukel ken herbicides.
Iti las-od ti 20 a minutos ket kabaelan ti drone ti mangpasuyot iti abuno ti maysa nga ektarya wenno kaibatugan na iti 3 nga ektarya iti uneg ti maysa nga oras isut gapuna nga amang nga al-alisto no maikumperar iti dati a wagas dagiti mannalon.
Ti Futurerice farm kaddua na ti Crop Protection Division, Rice Farming Mechanization ken dadduma pay nga ahensya ti gobyerno ti naiget a mangad-adal ti baro a teknolohiya a drone para iti moderno a wagas iti panagtalon.
Kalikaguman ti Philrice a mapayalisto ti wagas a panagtalon dagiti mannalon ken tapno dida unay mabannog ken maparigatan isut gapuna nga agtultuloy latta ti panagsukisokda kadagiti mabalin a mausar nga equipment kas iti drone farming.
Inpakaammo ti PhilRice a mabalin nga upaan ti drone para iti panagabuno iti P850.00 iti kada ektarya.
Bernard Ver, RMN News
