Gipanganti karon sa bag-ong hepe sa Dangerous Drugs Board (DDB) Dionisio Santiago nga hugtan pa’g maayo sa gobyerno ang kampanya kontra sa iligal nga drogas pinaagi sa mas gipalig-on pa nga mga programa o krusada kontra sa pagkuyanap ning maong kontrabando.
Sa usaka news conference sa Malacañang, gibatbat ni DDB chief Dionisio Santiago nga tutukan sa estado ang drug supply reduction sa tumong nga makibrahan kon dili man gani hingpit nga maundang ang pagkuyanap niini.
Si Santiago kanhi hepe sa Armed Forces of the Philippines (AFP) ug director-general sa Philippine Drug Enforcement Agency (PDEA).
Hatagan usab og emphasis sa gobyerno ang National Drug Education Program diha sa paglakip mismo sa curriculum sa mga eskwelahan ang drug education and awareness sa sayo pa lamang nga pangedaron sa kabatan-onon kinsa bulnerable kaayo ning maong bisyo.
Tunolan usab ug igong pagtagad sa gobyerno ang pag-establisar sa ‘evidence-based program’ diha sa anti-drug law enforcement operations silbing giya sa mga awtoridad samtang nagpatuman sa kampanya kontra drogas.
Adunay 49 ka mga drug rehabilitation centers and facilities sa nasud aron ipatuman ang aspetong rehabilitation niadtong mga lulong sa droga.
Base sa records, adunay gibanabanaang 4 milyon ka mga tawong anaa sa paggamit sa droga nga buot hatagan ug sufisyenteng focus sa drug enforcement operatives sa nasud.
Pikas bahin, hugot nga gipanghimakak ni Santiago ang alegasyon nga ‘anti-poor’ ang drug war sanglit daghan sa mga nangamatay mga pobreng lungsuranon uban sa pag-ingon nga ‘politically-motivated’ lamang ang nasangpit nga alegasyon.
Kasamang June Duterte
