Davao City – Nabungkag ang usa ka drug den sa Purok 2, Barangay 76-A ning syudad atol sa gipahigayong buy bust operation sa Philippine Drug Enforcement Agency Regional Office XI (PDEA XI) alas-2:40 sa kahaponon.
Base sa rekord sa pulis, arestado mao ang gituohang tag-iya sa drug den nga si Benido Malikay, 30 anyos kinsa nakapuyo sa maong lugar human kini napalitan sa usa ka poseur buyer og usa ka dakong sachet sa gituohang shabu nga mokantidad og 15,000 pesos.
Sa maong operasyon, sikop usab ang laing upat ka suspek nga mao sila si Kevin Harabina, Reynaldo Tolentino, Rocel Leoncion and Rolando Gordo samtang gi-rescue sa kapulisan ang upat ka mga minor nga anaa sab sa maong drug den.
Nakuha sa mga dinakpan ang duha ka sachet ug tulo ka mga gagmayng sachet nga gituohang shabu nga mokantidad og 195,000 pesos, buy bust money ug boodle money.
Mag atubang og kasong kalapasan sa Sections 5, 6, 7, 11, 12 ug 15 sa Article II sa Republic Act 9165 kon Comprehensive Dangerous Drugs Act of 2002 ang mga dinakpan samtang ang mga minors gi-turn over na sa Quick Response Team for Children’s Concern.
RadyoMaN Abi Bibera
