Drug den gipasira sa PDEA-PNP sa Tagum City

Davao City – Usa ka drug den ang gibungkag ug dol-an P200,000 nga kantidad sa ilegal nga druga ang nasakmit sa hiniusang elemento sa PDEA Davao de Oro Provincial Office, PDEA Davao del Norte Provincial Office ug Tagum City Police Station niadtong Pebrero 28, 2022 alas 4:00 sa kadlawon sa Purok 3H, Barangay Apokon,Tagum City, Davao del Norte.

Sa report gikan sa PDEA-X1 arestado ang subject sa buy bust operation nga si Alexander Batugan II, 49 anyos, driver ug live in partner nga si Nora Loja, 51 anyos, parehong residente sa nasangpit nga lugar tungod sa kakunsabo sa pagbaligya sa usa (1) heat sealed transparent plastic sachet sa gidudahang “shabu” nga nagkantidad ug P10,000 sa PDEA Agent nga nagsilbing poseur buyer.

Nasikop usab ang tulo (3) ka mga bisita sa drug den nga giilang sila si Calvin Cajes, Saje Cinco ug Eaguiboy Quilat nga nagsuyop og shabu sulod sa maong den.

Nasakmit sa mga awtoridad, ang duha (2) ka mga heat sealed transparent plastic sachet nga adunay gidudahang shabu nga motimbang og kapin o kulang dose (12) gramos, daghang mga basiyo sa plastic sachet nga adunay residue sa gituohang shabu, nagkadaiyang drug paraphernalia, buy-bust marked money ug boodle money.

Kasong kalapasan sa Republic Act 9165 Comprehensive Dangerous Drugs Act of 2002 ang ipasaka sa korte batok sa mga dinakpan.

RadyoMaN Don Pulayao