Nagpatigayon sang buy-bust operation ang gintingob nga pwersa sang Philippine Drug Enforcement Agency (PDEA ), Sultan Kudarat Provincial Office kag Tacurong City Police sa Purok Yellowbell, New Isabela, Tacurong City, Sultan Kudarat sang Enero 22, 2019, nga nagresulta sa pagkadismantle sang drug den kag pagkakumpiskar sang shabu.
May-angot sini, naaresto si Arnold Villamor Posadas, alias Panoy, targetlisted, 35 –anyos, single, pintor, matapos nga magbaligya sang isa ka sachet sang suspected shabu sa PDEA Agent nga nagpakilala nga poseur buyer kambyo sa P500.00 buy-bust money.
Si Posadas ang una na nga nagsurender sa mga utoridad, apang napaslawan nga magtambong sa mga aktibidad sa community based rehabilitation programs sa ila barangay ,kag nagpadayon sa iya illegal drug activities kag ginhimo nga drug den ang iya puluy-an.
Sa nasambit man nga buy-bust operation, naaresto ang iban pa nga drug personalities nga ginkilala kanday Wilfredo Posadas Depalubos, Jr. 25 -anyos, drug den maintainer, residente sang Tacurong City, Edmor Villamor Edjec, 44-anyos, jobless, residente sang Digos City kag King Roger Bilgera Castillanes *, *23-anyos, laborer, kag residente sang Tacurong City, nga nagapatigayon sang pot session sa den.
Samtang isa man ka 13 –anyos kag 15-anyos nga mga kabataan nga lalaki nga yara sa drug den ang narescue.
Nakumpiskar sa operasyon ang 2 small kag 2 ka medium-sized transparent plastic sachets nga may unod nga suspected shabu , may kabug-aton nga more or less 10 grams nga nagakantidad sang P 68, 000.00 kag pipila pa ka drug paraphernalia.
May-angot sini, si Posadas ang nagapangatubang sang kaso nga pagbayolar sa Section 5, 6, 11 kag 12 sang Article II sang Republic Act 9165 (Comprehensive Dangerous Drugs Act of 2002).
Pagbayolar naman sa Section 6 ang ipasaka nga kaso kay Depalubos, samtang Section 7 ang ipasaka kanday Castillanes kag Edjec.
Ang duha naman ka mga menor de edad ang ginturn-over sa City Social Welfare and Development Office (CSWDO) para sa nagakaigo nga intervention, apang ang apat ang nakadetine sa PDEA 12 Detention Facility.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
