Arestado ang nagapanag-iya sang drug den kag apat nga iban pa sa ginpatigayon nga buy-bust operation sang PDEA Sarangani, PDEA South Cotabato, South Cotabato Drug Enforcement Unit kag Polomolok MPS sa Abrea Homes, Brgy. Cannery, Polomolok, South Cotabato.
Ginkilala ang target sang operasyon kay Mary Joy Ostaga, alias Tabeb, 30-anyos, private company employee.
Imbolbado suno pa ang suspek sa illegal drug trafficking sa Polomolok, Gensan City kag Alabel, Sarangani.
Nagaoperate ang nasambit nga drug den sa sulod sang tatlo ka bulan sa mismo puluy-an sang suspek.
Naaresto man sanday Jocelyn Albaño, 45-anyos, Jojean Saul, 31-anyos, isa sa ginaaligar nga source sang drugs, Ariel Felisida, 40-anyos, kag Ronald Lascuna, 40-anyos, electrician.
Nakumpiskar naman sa operasyon ang 10 ka sachets sang suspected shabu, may kabug-aton nga more or less 5.20 grams nga nagakantidad sang P35, 360.00 kag assorted drug paraphernalia.
Kaso naman nga pagbayolar sa Article II, RA 9165 ang ipasaka batok sa mga suspek nga nakadetine sa subong sa PDEA 12 Custodial Facility.
