Patay ang usa ka drug listed personality human misukol atol sa hiniusang operasyon sa kapulisan sa Manticao, Misamis Oriental ug Provincial Drug Enforcement Unit kagahapon sa kadlawon.
Sa interview sa dxCC-RMN kang Police Captain Antonia Labitad, Hepe sa Manticao Municipal Police nga ang suspect nailang si Ariel Macas, Jr, 32 anyos nga taga Barangay Puerto ning syudad sa Cagayan de Oro.
Gipasabot ni Captain Labitad nga ila untang isilbi ang warrant of arrest batok kang Macas sa kasong paglapas sa Republic Act 9165 apan nibunot kini og armas hinungdan napusilan sa mga pulis.
Nakuha sa crime scene ang caliber 38 nga armas nga dunay upat ka bala, pito ka transparent sachet nga dunay traces sa shabu, drug paraphernalia ug 45-mil pesos.
Gidugang ni Captain Labitad nga niadto pang bulan sa Abril ning tuiga gimanmanan sa kapulisan si Macas human nakadawat og report nga gapamaligya kini og druga sa Manticao ug gatabok tabok sa ilang lungsod ug sa Barangay Puerto ning syudad.
