Patay ang usa ka drug pusher human misukol sa kapulisan atol sa joint drug buy bust operation niadtong Biyernes sa gabie sa Purok 7, Linangkayan, Naawan, Misamis Oriental.
Ang suspek mao si Carlo Mamauag nga taga Barangay Mapulog sa nasangpit nga lungsod.
Matud ni Police Sr. Insp. Arlyne Ranario, Public Information Officer sa Misamis Oriental Provincial Police Office nga nibunot sa iyang armas ang suspek ug nagpabuto busa napugos ang mga operatiba sa pagpusil niini.
Gidala pa sa ospital si Mamauag apan gideklarang dead on arrival.
Nakuha gikan sa possession sa suspek ang usa ka buhing bala sa 12 gauge shotgun, usa ka libo ka pesos, cellphone, key chain ug usa ka heat sealed crystallized substance nga gituohang shabu isip buy bust item.
Gihimo ang operasyon pinaagi sa hiniusang pwersa sa kapulisan sa Naawan Municipal Police Station, Provincial Intelligence Branch ug Provincial Drug Enforcement Unit sa Misamis Oriental.
