BACOLOD CITY – Nagapabilin nga daku nga problema sang PNP Regional Office 6 ang Bacolod City kag Negros Occidental sa bahin sang illegal nga druga.
Ini ang gin-ako ni Police Regional Office 6, Regional Director Police C/Supt. John Bulalacao sa interview sang DYHB angut sa ginapatuman karon nga ‘calibrated approach’ sang PNP sa illegal drugs kag tanan nga sahi sang illegal activities.
Suno kay Bulalacao nga daku gihapon nga problema sa bahin sang illegal drugs ang Negros kag Bacolod bangud man pag-gamit sini bilang transhipment point halin sa Mindanao, Cebu kag Manila.
Isa sa ginatumod nga factor ni Bulalacao sa padayon nga illegal drug activities amo ang pag-usar sa mga pwerto ukon sea ports gani mahapos ang movement bangud sang kakulang sa pwersa partikular ang maritime group kaangay sang Philippine Coastguard.
Pahayag niya nga may iban man nga focus ang coastguard samtang ang PNP naman ang wala sang capability sa tubig rason padayon ang movmenet sang illegal drugs pasulod sa Negros kag Bacolod halin sa iban nga bahin sang pungsod.
Angut sini, ginpahayag ni Bulalacao nga naga coordinate na sila sa Philippine Coast Guard nga mag-dugang na kuntani sang mga K9 unit nga capable mag check sang mga pasahero nga naga-gamit sang maritime vessel.
Apesar sini, gina-acknowledge ni Bulalacao nga nagatrabaho man ang PNP Provincial director kag city director kon diin madamo man gani ini sang accomplishment.
Apang gin-ako man ni Bulalacao ng tubtob may mga politiko kag katapo mismo sang PNP nga nagahatag sang proteksyon, indi gihapon madula ang problema sa illegal nga druga kag iban pa nga sahi sang illegal activities.
Madumduman nga sadto, ang probinsya sang Iloilo amo ang numero uno nga problemado sa illegal drugs kon diin gintawag pa gani ini ni Pangulong Rodrigo Duterte bilang “most shabulize” region apang karon, ini ang nahagan-hagan na./Photo courtesy of PTV-4
