Gisugdan na sa Cagayan de Oro City Local Environment and Natural Resources Office o CLENRO ang dry run sa No Segregation, No Collection policy sa Barangay uno hangtud Barangay 40.
Ang dry run gisugdan niadtong Hunyo uno ug molungtad sa Hunyo 30 ning tuiga.
Ang maong lakang subay sa gimando sa Article IV, Section 6,7 ug Article VI, section 17 sa city ordinance number 13378 – 2018 o Integrated Ecological Solid Waste Management Ordinance.
Matud ni Engr. Armen Cuenca, hepe sa CLENRO nga angayng ma-segregate ang mga basura gikan sa panimalay ug mga establisemento ug dili kini kolektahon kung wala mahisubay sa maong ordinansa.
Base sa maong ordinansa, kinahanglan dunay kaugalingong sudlanan ang matag klase sa basura sama sa mga malata o biodegradable, recyclable ug ang mga dili na mapuslan.
Ipagawas lamang ang maong mga basura sa gitakdang oras sa pagkolekta.
Ag mga malata o biodegradable wastes kolektahon sa IPM sugod alas sais sa buntag hangtud alas dose sa udto lamang matag adlaw, samtang ang mga dili malata ug dili na mapuslan nga mga basura kolektahon matag alas sais sa gabii hangtud alas dose sa tungang gabii matag adlaw.
Ang mga malata nga basura kinahanglang ibutang sa mga sudlanan nga dunay taklob ug gidili ang pagbutang niini sa mga plastic cellophane o trash bags.
Samtang sa Hulyo uno ning tuiga sugdan ang hingpit nga pagpatuman sa No Segregation, No Collection policy.
