Nag-umpisa na release ang Department of Social Welfare and Development Office ukon DSWD 12 sang social pensions sang mga indigent senior citizens sa rehiyon kag target nga mapadasig ang distribution sang nasambit nga benepisyo sa mga senior citizens nga apektado sang ginapangatubang nga global health crisis.
Nagalab-ot sa P793 million ang pondo para sa anum ka bulan nga social pensions sang mga senior citizens nga para sa bulan sang Hulyo tubtob Disyembre subong nga tuig.
Suno kay DSWD 12 Regional Director Cezario Joel Espejo yara sa 264,358 ka mga kwalipikado nga senior citizens sa rehiyon ang makabaton sang P3, 000.00.
Ginpahayag sang regional director nga nagabinuligay sila sang mga local officials sa rehiyon agud mapadasig ang distribution sang nasambit nga benepisyo nga indi man makompromiso ang mga health protocols.
Sang nagligad nga adlaw ginpatigayon ang distribution sang social pension sa Maasim, Saranggani Province sa diin 4,082 ka mga senior citizens ang target nga nareleasan.
Nahibaluan nga ang DSWD ang nagaimplementar sang Republic Act (RA) No. 9994 ukon ang Expanded Senior Citizens Act of 2010 nga ang indigent senior citizens ang makabaton sang P500 monthly stipend.
