Dugang nga benepisyaryo kag pundo para sa social pension sang senior citizens sa Bacolod, ginaduso

BACOLOD CITY – Pagahingyuon sang City Government ang Department of Social Welfare and Development (DSWD) nga dugangan ang numero sang mga benepisyaryo kag pasakaan ang pundo para sa social pension para sa mga senior citizens sa Bacolod City.

Isa ka resolution para sa amo nga katuyuan ang ginduso ni Councilor Celia Flor, ang chairman sang Committee on Senior Citizens and Veterans Affairs, nga gin-ugyunan sang iban pa nga mga konsehal sa ginhiwat nga regular session kahapon nga adlaw.

Suno kay Flor, yara lamang sa kapin 2,700 ang mga senior citizens nga nagabaton sang social fund sa Bacolod, mas dyutay kun ikumparar sa 13,000 sa Iloilo City, nga pareho man nga highly-urbanized city.

Nahisayran sini gikan kay DSWD Region 6 Director Ma. Evelyn Macapobre nga ini bangud 2,700 lamang ang mga benepisyaryo sa validated list nga ginpadala sang Office of the Senior Citizens Affairs (OSCA).

Ang request, nga kun maaprubahan mangin epektibo sa madason nga tuig, ang ipadala sang City Government sa DSWD Central Office paagi kay Secretary Erwin Tulfo kag kay Regional Director Macapobre.

Ginahingyo man sang konseho ang bulig nanday Bacolod Lone District Congressman Greg Gasataya kag Abang Lingkod Partylist Representative Stephen Paduano para sa dugang nga alokasyon sa tuig 2023.