BACOLOD CITY – Liwat nga magapanagtag sang relief assistance bwas nga adlaw, Miyerkules ang Department of Social Services and Development – DSSD para sa mga survivors sang sunog nga natabo sadtong Domingo sang aga sa Purok Kabukiran, Brgy. Taculing, Bacolod City.
Ginpahayag ni DSSD Cluster Head, Gina Castro nga ginahanda na karon sang ila talatapan ang mga relief goods para sa mga biktima nga ginalakipan sang 6 ka kilo sang bugas, 8 ka noodles kag mga canned goods.
Nahibaluan nga sang Lunes gilayon na naghatag sang assistance ang Dept. of Social Services and Development sa mga biktima kag karon liwat naman sila nga nagapamutos sang mga goods agud ipanghatag bwas.
Sa pihak nga bahin, ginpahayag ni Bacolod City Mayor Evelio Bing Leonardia nga gilayon nga ginpadasig sang ciudad sang paghatag sang assistance sa mga fire survivors.
Nahibaluan nga ang mga pamilya nga totally burned ang balay ang maka-baton sang 10 mil pesos samtang 5 mil pesos naman ang partillay damaged.
Madumduman nga 31 ka pamilya ang apektado sang sunog sadtong Domingo mg alas 6 sang aga sa Prk. Kabukiran, Brgy. Taculing, Bacolod City kon diin ang ginsindihan nga kandila bangud sang brownout amo ang ginatumod nga rason sang sunog./ Bacolod City PIO photo
