CAPIZ – Mabaton na sang mga 5 ka libo ka Barangay Health Workers , Barangay Service Workers kag Community Health Partners sang gobierno probinsyal ang dugang nga cash incentive naguikan sa gobierno probinsyal sang Capiz.
Pagapatigayunon ang distribusyon sang insentibo sa Disyembre 14 sa Capiz Gymnasium nga pagapangunahan ni Governor Tony del Rosario kag Legal Office/GAD Focal Point Person Atty. Ronnie Dadivas.
Naglab-ot sa 2 ka libo ka pesos ang igahatag nga cash incentive sa mga bhw/bsw/chp dugang sa nauna na nila nga nabaton sini nga tuig.
Ini katumanan sang promisa ni Governor Tony del Rosario nga dugangan ang guinabaton nga insentibo sang iya mga kapartner sa pagtatap sa ikaayong-lawas kag iban pa nga kinahanglanon sang pumoluyo sa barangay sa diin ang anay 2 ka libo ka pesos lamang kada tuig ang guinhimo sini nga apat ka libo ka pesos .
Luwas pa sa iskolarship sa ila kabataan sa kolehiyo.
Nahibaluan nga nagpain sang kabug-usan nga 10 milyunes pesos ang gobierno probinsyal para sa BHW subong nga tuig .
(c) Capiz Aksyon News Center
