Nasikop sa PDEA Reg. 10 ang duha ka babaye atol sa pag-raid sa duha ka balay sa Sitio Carinugan, Lower Balulang ning syudad mga alas-8:35 kagahapon sa buntag.
Giila ni PDEA-10 spokesperson Ben Calibre ang mga suspek, nga silang Pidao Macaondot alias Jalilah Tangco o Jalailah Macapanton ug Divina Sumagayan nga managsilingan sa Sitio Carinugan, Lower Balulang ning dakbayan.
Nasikop ang duha sa PDEA-10 pinaagi sa search warrant nga giisyu sa husgado.
Nakuha gikan sa balay ni Macaondot ang siyam ka pakite sa gituhoang shabu, nga nagbalor sa 102-mil pesos.
Nakuha usab sa kwarto ni Sumagayan ang walo ka pakite sa gituhoang shabu nga gibana-banang nagbalor sa 68-mil pesos.
Lakip sa nakuha sa kwarto sa suspek ang iyang kwarta nga kapin 31-mil pesos.
Dugang pa ni Calibre nga dugay na nilang gipaubos sa surveillance ang mga suspek ug ila na untang himoan sa operasyon apan dili gakahinayon kay dili pa igo ang gihatag kanila nga impormasyon.
Sa karon ang duha detinado na sa mini cell sa PDEA 10 ug gikatakdang pasakaan og kaso karong adlawa sa kasong illegal possession of prohibited drugs.
