General Santos City–Hingpit nang napasakaan ug kaso ang duha ka mga babayeng una nang nasikop sa gihimong anti-illegal drug operation sa police station 6, RPDEU sa pakig-alayon sa PDEA-12 sa area sa zone 9 Barangay Bula, Corner P. Acharon Blvd. ning syudad.
Matud ni P/Captain Brent Ian Salazar, ang hepe sa Police Station 6, ila nang napasang-at ang kasong kalapasan sa RA 9165 batok sa suspek nga silang si alias Shiela, Minyo usa ka call center agent ug nanimuyo sa Zone 2-b Barangay Bula ug Alias Vivien , 28 anyus nga nanimuyo sa Camella Homes Barangay San Isidro.
Una nang nasikop ang duruha sa may Barangay Bula niadtong nakalabayng semana kung asa nakuhaan ug iligal nga droga ang mga nasampit. Gikaingong ginahimo lamang sa usa sa mga suspek nga front ang trabaho niini isip call center agent aron siya dili basta bastang madakpan sa kapulisan.
Samtang basi sa interview sa kapulisan ngadto sa mga dinakpan, sagad sa ilang mga costumer mga driver ug aduna usay mga estudyante butang nga gikaalarman sa labao sa Police Station 3.
Dako usab ang pagtuo ni Salazar nga aduna pay mga kaubanan ang duruha sa ilang operasyon dinhi sa Gensan sukwahi sa ilang pahayag nga wala silay kaubanan. Nasayran nga base sa unang pahayag sa mga suspek ilang ginakuha ang shabu nga ilang ginabaligya sa usa ka ginganlan lang ug kuya nga taga Maguindanao Province.
