Patay ang duha ka drug pushers atol sa gihimong joint buy bust operation sa Opol Municipal Police Station ug Misamis Oriental Drug Enforcement Unit sa Barangay Malanang, Opol, Misamis Oriental.
Matud ni Misamis Oriental Police Provincial Spokesperson Insp. Princess Joy Velarde nga ang mga suspect mao silang Nick Macalalag Jr., 50 anyos nga taga-Rosario Heights, Iligan City ug Joseph Macale, 32 anyos nga taga Xavier Heights, Upper Balulang ning syudad.
Nasayran nga nisukol ang mga suspect sa dihang namatikdan nga pulis ang ilang ka transaksyon.
Unang nagpabuto si Macale, gamit ang iyang caliber 38 nga armas samtang gilabay sa granada ni Macalalag ang mga operatiba.
Tungod niini, nibalos og pabuto ang mga pulis nga maoy hinungdan sa pagkamatay sa mga suspek.
Nakuha sa kapolisan gikan sa mga suspek ang duha ka dagkong sachet sa gituohang shabu, usa ka libo nga buy bust money ug usa ka taxi nga maoy gisakyan sa mga suspek.
Narecover usab sa kapulisan gikan ni Macale ang kalibre .38 nga revolver ug mga bala lakip na ang wala nibutong granada ni Macalalag.
Gihimo ang operasyon niadtong Martes sa alas siyete sa gabie.
