Duha ka mga suspected drug pushers ang nasikop sa kapolisan sa managlahing drug buy bust operation sa Cagayan de Oro ug Misamis Oriental.
Unang nasikop sa drug buy bust operation sa El Salvador City sa Misamis Oriental ang drug suspect nga nailang si Dennis Pastera, 38 anyos ug taga Zone 2, Barangay Agusan ning syudad sa Cagayan de Oro.
Matud ni Senior Inspector Arlyne Ranario, Spokesperson sa Provincial Police Office sa Misamis Oriental nga alas 9:30 ang takna sa gabie niadtong Lunes uban sa mga elemento sa Intelligence Branch sa Misamis Oriental naglunsad sa drug Buy Bust Operation ang kapolisan sa El Salvador City sa Barangay Pedro sa Baculio sa El Salvador City.
Kini nga operation nagresulta sa pagkasikop sa maong suspek.
Nakuha gikan sa possession sa maong suspek ang duha ka pakite sa gituohang shabu, 500 pesos nga mark money, disposable lighter ug make-up kit.
Samtang sa dinhi sa Cagayan de Oro, wala usab maka-ipsot sa drug buy bust operation sa kapolisan sa Bulua Police Station ang usa ka lalaking nagnegosyog illegal drugs.
Matud ni Bulua Police Chief, Chief Inspector Ericson Sabanal nga si Jeffrey Yecyec, 21 anyos ug taga Zone 1, Barangay Kauswagan.
Matud ni Sabanal nga ang maong suspek ilang nasikop sa drug buy bust operation sa Barangay Kauswagan, mga alas siete kagabi-e.
Gidugang ni Sabanal nga ilang nakuha gikan sa possession sa maong suspek ang usa ka pakite sa gituohang shabu, 1,000 pesos nga mark money, cell phone ug 80 pesos nga personal money sa maong suspek.
Ang nasangpit nga drug buy bust operation gisaksihan ni Kauswagan Barangay Kagawad Artagnant Pimentel.
Ang maong suspek, gidetain sa Maharlika Detention Cell ug nagpaabot nga pasakaan sa kasong drug pushing karong adlawa.
