Gensan General Santos City—Patay sa duha ka sunod-sunod nga operasyon sa Regional Drug Enforcement Unit (RPDEU), Police Station 2, Police Station 4 ug uban pang unit sa kapulisan ang duha ka mga high value target sa illegal drugs atol sa gipahigayong anti-illegal drug operation kagahapong adlawa.
Alas 4:00 sa hapon dihang gipahigayon ang buy-bust operation sa Barangay Sinawal, batok kang Muhammad Abdul Mabang, 22 anyos, minyo, residente sa Estaros, Barangay Rosary Heights, Cotabato City. Sumala pa nga napalitan ug usa ka sachet sa gituohang shabu ang suspek sa usa ka Police nga nagpakarong-ingnong poseur buyer, apan namatikdan matud pa sa suspetsado nga police ang iyang katransaksyon mao nga mibunlot kini sa iyang pusil dayon gipabuthan ang kapulisan apan nabaslan kini hinungdan sa pag-angkon niini ug samad sa lawas.
Dali kining gidala sa ospital apan gideklara kining dead on arrival. Gikaingong makonsiderang high value target sa illegal nga droga ang nasangpit nga suspetsado. Narekober gikan sa iyang posisyon ang usa ka unit nga homemade Uzi nga armas; usa ka magazine nga adunay upat ka mga buhing bala; mga basyo ingon man ang duha ka sachet sa gikatahapang shabu ug buy-bust money nga P500.00.
Samtang alas 4:20 ang takna dihang gipahigayonan usab ang laing Buy-bust operation ang usa ka high value target nga si Saud Panda Salipa, residente sa Rosary Heights 9, Cotabato City sa area sa Purok Udagre, barangay Conel. Patay usab ang nasangpit dihang kini misukol sa kapulisan.
Ayha kini napusilan sa otoridad, napalitan kini ug usa ka small sachet sa gituohang shabu gamit ang P500.00 nga marked money, dihang nakabantay nga police ang iyang katransaksyon kini misukol mao nga napusilan. Gidala pa sa ospital ang suspek apan gideklara kining dead on arrival. Narekober sa iyang posisyon ang usa ka unit sa .38 revolver; 3 rounds sa buhing bala sa .38 revolver; duha ka fired Cartridge sa .38 revolver ug 9mm nga pusil.
Apil usab sa mga narecover ang sling bag sa suspek nga may unod nga mga resibo sa pawnshop ug usa ka dakong sachet sa gikatahapang shabu nga gibana-banaang anaa sa 5 gramos nga nagkantidad usab ug 50 mil ka pesos.
