Patay ang duha ka igsoon atol sa gihimong Joint Drug Buy Bust Operation sa Tagoloan, Misamis Oriental kagabie.
Matud ni Misamis Oriental Provincial Police Office Director Senior Supt. Rolando Destura nga ang mga namatayng suspek mao silang Jerry ug Jeffrey Handayan, hingkod ang panuigon, ug taga Purok Faustina, Barangay Kimaya, Jasaan, Misamis Oriental.
Gibutyag ni Destura nga misukol sa mga pulis ang duha ka mga igsoong suspek hinungdan sa ilang kamatayon.
Mga alas 11:50 kagabie, ang kapolisan sa Tagoloan uban sa mga elemento sa Intelligence Branch ug Drug Enforcement Unit sa Misamis Oriental Provincial Police Office, naglunsad sa ilang Joint Drug Buy Bust Operation sa Sitio Karampil, Barangay Baluarte, Tagoloan, Misamis Oriental nga niresulta sa pagkamatay sa duha ka mga suspek.
Matud ni Destura nga sa dihang nakamatikod ang duha ka mga suspek nga pulis ang ilang ka-transaction sa illegal drug nagpaboto kini sa ilang .38 caliber revolver ug ilang gipamusil ang operating troops.
Apan suwerti kay walay naigo sa mga police busa mibalos kini sa pagpaboto sa ilang mga armas ug naigo ang duha ka mga suspek nga naghatud sa ilang kamatayon.
Gibutyag ni Destura nga narecover sa mga imbestigador gikan sa duha ka mga suspek ang ilang tagsa-tagsa ka .38 caliber revolver ug usa ka granada.
Lakip sa narecover sa mga otoridad ang 20 ka pakite sa gituohang shabu gikan sa patayng lawas ni Jeffrey ug tulo ka pakite sa patayng lawas ni Jerry.
Samatang, Matud ni Destura nga naglisod ang mga polis sa pag-ila asa gikan ang suspected shabu nga gibaligya sa mga suspek.
Apan matud sa maong police official nga duna nay ilang Matrix Diagrams aron ilhon asa gikan ang illegal drugs nga gidistribute sa Misamis Oriental.
