Pagadian City – Gibalhog sa Pagadian City Police Station detention cell ang duha ka lalaki nga nadakpan atol sa gihimo nga entrapment operation sa tropa intelligence operative sa kapulisan sa syudad diha sa Almonds Pensionne House nga nahimutang sa Purok Lawis, Brgy. Santa Lucia ning dakbayan alas 11:15 sabado sa buntag.
Giila ang mga nadakpan nga sila Jomar Odin, 19 anyos, ulitawo, residente Purok 5, Guinicolalay, Dinas ug Juhair Tagadtal, 23-anyos, ulitawo lumulupyo sa Purok Maligaya, Lower Sang-an , Labangan Zamboanga del Sur.
Sa imbestigasyon nasayran nga nawad-an og cellphone ang 19-anyos nga dalagang estudyante nga si Loryjell Rivera taga Purok Nangka, Upper Pantad, San Pablo ning probinsya ug iya kining gitaho ngadto buhatan sa kapulisan pinaagi sa paghulagway sa maong cellphone nga mokantidad sa P19, 000.
Misugid ang biktima nga dihang iyang gipakigkutayan ang iyang cellphone usa ka lalaki ang mitubag niini ug mitug-an nga nakit-an ang maong cellphone sa Djanggos Resto Bar.
Nagpakilooy ang biktima ngadto sa lalaki nga nakakaplag nga iuli nalang kini apan mi-demand ang lalaki nga ipalukat sa kantidad nga 3mil pesos ug mihangyo pa nga makighilawas bugti sa pagbalik sa cellphone.
Wala na makalugnot ang duha ka ulitawo dihang pulis na diay ang ilang ka-transaksyon.
