Matapos sang lima ka adlaw kag lima ka gab-e nga nagpa-utaw-utaw sa tunga sang kadagatan, nakit-an na ang duha ka mananagat nga taga-syudad sang Sipalay nga ginsampay ukon gin-anod sa Barangay Balagunan, banwa sang Ciocon, Zamboanga del Norte kiana sang aga.
Halos milagro ang natabu nga buhi kag safe ang duha mananagat matapos nga naka-angkon sang engine trouble ang ila sakayan.
Madumman nga Pebrero 18 sang una gin-report nga na-missing sanday Alexander Alagao, 73 kag Rico Noguia, 53, residente sang Sipalay City, Negros Occidental.
Ini sila ang sakay sang pumpboat nga pangalan ‘BEST FRIEND’ sa diin naka-eksperyensya sang trouble sa makina.
Nagpatigayon sang search and rescue operation sang Philippine Coast Guard, Bantay Dagat kag Sipalay DRRMO apang wala gid nakit-an ang duha ka mananagat particular sa mga area nga ila posible masampayan.
Sa interview sang RMN-DYHB sa DRRMO Cluster head sang Sipalay City – former Councilor Dionilo Bogtae nga bag-o gid lamang siya gintawgan sang Ciocon Rescue angot sa ila duha ka residente nga nakalab-ot sa Zamboanga del Norte.
Na-istorya man ni Bogtae si Alagao, ang isa sa mga mananagat sa diin safe naman sila kag halos nga indi makapati nga makasalbar matapos nga nagpa-utaw utaw sang lima ka adlaw sa tunga sang lawod antis sila ginsampay sa area na sang Mindanao.
[image: image.png]
