Gikumpirma ni Police Senior Inspector Allan Cairel ang Hepe sa Police Station 10 Cugman nga tinuod nga dunay nagpa-record nga duha ka menor de edad nga gitionan og armas sa usa ka polis sa iyang buhatan.
Matud ni Senior Inspector Cairel nga gitambagan ang mga biktima nga mobalik pagka-ugma sa ilang buhatan aron nga maasikaso sa Womens and Children Protection Desk kon W-C-P-D ug matabangan nga mapasakahan og kaso apan midangop hinoon kini sa DXCC.
Dugang pa ni Senior Inspector Cairel nga iyang giadtoan ang area ug nahinabi mismo niya ang gitudlong polis nga si PO2 Dexter Caging ug ang amahan sa usa sa mga biktima.
Natingala na lang si Senior Inspector Cairel nga dunay affidavit nga nakabutang sa iyang lamesa ug pinirmahan sa amahan sa mga bata nga nag-ingun nga dili na kini interesado nga mopasakag kaso batok sa maong polis.
Samtang giangkon sa amahan sa usa sa mga biktima nga si Mr. Alex Sabaldana Sr. nga gitambagan siya sa Hepe sa Cugman polis nga mobisita sa ilang buhatan.
Matud ni Sabaldana, wala siya misunod sa gisulti sa polis tungod kay miadto kanila si PO2 Dexter Caging ug gidala sila sa usa ka abogado.
Dugang pa ni Sabaldana nga gipapirma ang iyang anak atubangan sa abogado nga walay nahitabong pagpanion.
Gikumpirma usab ni Sabaldana nga nangayo kaniya og pasaylo si PO2 Caging tungod kay hubog matud pa kini dihang nahitabo ang insidente.
