Pulitika ang usa sa motibong gitutukan karon sa Talakag Municipal Police Station sa nahitabong pagpusil patay ngadto sa duha ka mga barangay kagawad sa Barangay Dominorog, Talakag, Bukidnon.
Nasayran nga alas 9 sa buntag kagahapong adlawa, paingon unta sa Barangay Hall sa Dominorog, Talakag, Bukidnon ang duha ka mga Kagawad apan kalit lang gipamusil duha sa suspek nga armado sa .45 nga calibre sa armas.
Gi-ila ni Police Capt. Dominador Orate, ang hepe sa Talakag PNP ang duha ka mga biktimang kagawad nga sila si Lorenzo Pedyaan kinsa namatay on the spot ug usa ka Mauricio Guinto nga gideklarang dead on arrival sa balay tambalanan.
Sa inisyal nga imbestigasyon sa PNP nasayran nga samtang ang mga biktima pasulod sa gate sa barangay hall, gipusil kini sa wala mailang gunman.
Si Pedya-an, naka-angkon ug samad pinusilan sa iyang walang dughan samtang si Guinto naka-angkon ug samad sa iyang walang bahin sa iyang ulo.
Matud ni Orate nga daghang angulo ang ilang gitutukan apan ang pinakabug-at mao ang pulitika.
Sa karon nanawagan ang hepe sa publiko nga kung kinsa man ang nakakita sa mao nga krimen, makiglambigit sa ilaha aron sa posibleng pag-ila o pagsikop sa suspek aron mahatagan ug hustisya ang pamilya sa mga kagawad nga namatay.
