BACOLOD CITY -Nagapatigayon karon sang hot pursuit operation ang Criminal Investigation and Detection Group (CIDG) Bacolod batok kanday Barangay Felisa Secretary Stephen Jalando-on, Liason Officer Rose Jean Estado kag Purok President Corazon Latoza.
Gin-dagdagan ang tatlo ka opisyal sang warrant of arrest sa 7 counts sang violation sang RA 3019 ukon Anti-Graft and Corrupt Practices Act bangod sang gina-alegar anomaliya sa distribusyon sang Social Amelioration Program (SAP).
Ang warrant of arrest ang gin-issue ni Presiding Judge Sue Lynn Lowie-Jolingan sang RTC Branch 53 kag nagrekomendar ang korte sang pyansa nga P90,000 kada isa ka count.
Sa interview sang DYHB kay CIDG Bacolod head Police Chief Master Sergeant Ramiro Gocotano, antes pa man ang paguwa sang warrant sang Branch 53, nakapyansa na ang tatlo sa pareho nga kaso sa idalom sang Branch 49 sang RTC apang 1 count of violation lang ang ila nga ginpangatubang.
Si Punong Barangay Ramon Jardin ang ginreklamo man apang wala nagsaka sa korte bangod ginbasura ini sa piskalya. Samtang, ginpahayag ni Gocotano nga may naga-alegar nga gintago ni Kapitan Jardin ang tatlo sa isa ka safe house sa Bacolod.
Ginkadtuan sang DYHB si Punong Barangay Jardin agod kuhaon sang reaksyon apang nagbalibad na ini kag subong man sa pamilya sang mga akusado santo sa advice sang ila mga abogado.
[image: image.png]
