Davao City- Parehong gipangdala sa Southern Philippines Medical Center sa mga personahe sa Central 911 ang biktima ug respondent tungod kay pulos nakabaton og samad ingon man mga bun-og sa kalawasan.
Sa blotter sa Talomo PNP, ang biktima mao si Gerald Laugo, 33 anyos, construction worker ug nagpuyo sa Catalunan Pequeno, Davao City, samtang ang suspek mao si Elinito Abanda, 38 anyos, nagpuyo sa susamang dapit.
Sa imbestigasyon sa kapulisan nanag-inom ang biktima ug suspek uban ang ilang mga kakaubanang construction worker apan miulbo ang panaglalis nga miresulta sa pagpanigbas ni Abanda kang Laugo rason nga nakabaton kinig samad tinigbasan sa iyang ulo nga bahin.
Samtang ang suspek nakabaton usab ug mga bun-og kay gitabangan usab kinig kulata sa iyang mga kauban nga dali usab nanibat sa dihang miresponde ang mga kapulisan alas onse sa kabuntagon.
Narecover sa crime scene ang dose pulgadas nga sundang.
Sa pikas bahin, patay sab ang usa ka construction worker human gitabangan ug kulata alas 11:40 kagabii natigayun didto sa dalan JP Laurel Ave. ning dakbayan sa Davao.
Subay sa report sa San Pedro PNP, naila ang biktima nga si Gregory Jambaro 26 anyos residente sa Purok 1 Zone 1 JP Laurel Ave samtang ang mga suspetsado ginganlan mao sila si Stephen Pabenal, Jesephen Pabenal, ug Shame Pabenal hingkod ang mga pangiraon way mga kompletong address.
Matud pa samtang pauli ang biktima sa ilang pinuy-anan niadtong tungora kalit giduol sa mga suspect ug gitabangan og kulata. Wa pa matagbaw ang mga suspetsado, gibunalan ang biktima gamit ang bakal.
Ang biktima gilayon gidala sa Southern Philippine Medical Center apan gideklara sa mga attending physician nga dead on arrival.
Samtang ang kapulisan nagpahigayon og manhunt operation niadtong tungora pinaagi sa tabang sa witness hinungdan nasikop ang usa ka suspetsado nga si Stephen Pabenal nga balhug na sa selda sa kapulisan sa San Pedro PNP ug pasakaan og kasong murder.
RadyoMan Erin Lumosbog/ RadyoMan Don Pulayao
