Balik operasyon na kaniadtong Lunes, Abril 20 ang duha ka mga dagkong sugar companies sa Northern Mindanao nga nahimutang sa probinsya sa Bukidnon (Quezon ug Maramag).
Kini human nga gitugutan na ni Governor Jose Maria Zubiri Jr. ang pagbalik sa operasyon sa BUSCO Sugar Milling Co. Inc. ug Crystal Sugar Co. Inc.
Nasayran nga ni-apilar si Department og Agriculture Secretary William Dar ni Gov. Zubiri nga tugutan ang pag-operate sa mga multi-nationals sa probinsya nga adunay kalambigitan sa pagkaon.
Mahinumduman nga nahunong ang operasyon sa maong duha ka mga milling companies kaniadtong Marso 28 tungod sa gipatuman nga general community quarantine sa Bukidnon tungod sa COVID-19 Crisis.
Ang Bukidnon adunay sobra sa 10,000 ka mga planters sa tubo.
Dili pa lamang dugay, gi-isyuhan sa DILG ug show cause order ang gobernador tungod sa pagpahunong sa mga operasyon sa mga kompanya sa probinsya sama sa pinya, saging ug uban pa. Gihimakak usab ni Governor Zubiri nga iyang gipahunong ang mga operasyon niini.
