Napasakaan na sang kaso nga theft of minerals suno kay Provincial Environment and Management Officer Sigfred Flaviano ang duha ka mga nadakpan sa pagpatigayon sang illegal mining ukon banlas operation sa boundary sang Barangay Pulabato, Danlag kag Tablu sa banwa sang Tampakan, South Cotabato sang tinalikdan nga adlaw.
Ginkilala ang mga napasakaan sang kaso kanday Raymart Arbening, 22-anyos kag Marcelo Arbening, 69-anyos pareho residente sang Barangay Centrala, Surallah, South Cotabato.
Nahibaluan nga narekober sa mga suspek ang pala, sledgehammer, hose, plastic pipes kag iban pa nga mga gamit sa pagmina kag tigayon man nga gindemolish ang gintukod nga bunk house sa lugar.
Suno kay Pemo Flaviano ang ila nga tikang ang tungod sa mas gin-intensify pa nga anti-illegal mining activities base sa kamanduan ni South Cotabato Governor Daisy Avance Fuentes.
Ginkumpirmar man niya nga nagapadayon ang hearing sang kaso sa korte sang mga nauna nila nga nadakpan bisan nga nakapyansa.
Pipila naman suno pa sa nadakpan ang financier ugaling lang wala man nagasipot sa hearing ang mga testigo.
May-angot sini, ginpasiguro ni Pemo Flaviano nga lauman ang sunod-sunod nila nga operasyon batok banlas activities samtang ginahulat pa ang ibutang nga isa ka company sa CAA sa lugar.
