Giharas sa wala pa mailang mga suspetsado ang tropa sa 1st Bukidnon Provincial Mobile Force Company nga nagpahigayon ug blocking/checkpoint sa Crossing Cabulohan, Cabulohan lungsod sa Cabanglasan, Bukidnon alas 7:30 kagabie (Hunyo 1, 2020).
Sa interview sa RMN ngadto kang Police Lt. Col. Silvestre Asiong Jr., ang hepe sa Provincial Investigation and Management Branch gibutyag niini nga naghimo ug blocking/checkpoint ang kapulisan sa mao nga dapit, gi-itsahan kini ug granada sa mga suspek nga sakay sa usa ka single motor.
Samdan sa mao nga insidente sila si Patrolman Alvin Claunan ug PSSG Junmark Suico nga daling gidala sa balay tambalanan ug anaa na karon sa luwas ang kahimtang.
Matud ni Col. Asiong nga nakabalos pa ang mga pulis ug pusil ngadto sa mga suspek nga nisibat paingon sa direksyon sa Barangay Mandaing sa mao nga lungsod.
Nagpadayon karon ang gihimong pursuit operation sa kapulisan batok sa mga suspek samtang nagpadayon ang gihimong imbestigasyon kalabot sa mao nga insidente.
