NANGAYO SANG PUBLIC APOLOGY subong nga adlaw ang tatlo ka indibidwal matapos nga nag viral ang mga litrato kag video nga nagapakita sang pagpangbastos kadungan sang highlight sang selebrasyon sang Dinagsa Festival sa syudad sang Cadiz sadtong Enero 25.
Ang tatlo ang nagkadto mismo sa opisina ni Mayor Salvador Escalante sang syudad sang Cadiz ang ginkilala nga sanday Stephen Matti alyas ‘Laura’, 19 anyos, John Rey Abela alyas ‘Wilma Bomba’, 20 anyos tanan lunsay sang syudad sang Silay kag isa ka babayi nga wala lang nagpalayag sang iya nga ngalan.
Personal nga nagpangayo sang pasaylo ang tatlo kag gin-ako ang kasal-anan nga nahimo sa pagbastos sa amo nga selebrasyon, sila ang nagpromisa man nga indi na magsulit sang amo nga hilikuton.
Angut sa amo nga hitabo, sila ang ginpabayad sang tag tres mil pesos (P3,000) bilang penalidad sa ordinansa sang syudad nga pagdumili sa pagbinastos sa public place. Dala man sa penalidad nga dapat himuon sang tatlo ang pagpalapnag sang maayo nga binuhatan ni Sr. Sto. Niño kag religious work.
Nagmando man ang kapulisan nga ipaidalum ang tatlo sa drugtest para mahibaluan kun bala ini sila ang nagagamit sang iligal nga druga.
[image: image.png]
