Natala ang duha ka mga sunog sa dakbayan sa Malaybalay kagahapon.
Sa interview sa RMN Malaybalay ngadto kang Senior Inspector Lyod Villaroya ang City Fire Marshall sa BFP Malaybalay gibutyag niini nga unang nahitabo ang sunog sa usa ka residential area P3, Brgy. Violeta, ning siyudad ala 1 sa hapon.
Gipanag-iyahan ang balay nga nasunog (totally damaged) ni Mr. Pedrito Salvaleon samtang partially damage usab ang panimalay nila ni Anastacio Maramba, Joe Montenegro ug Pedro Arocita.
Nagbilin ug damyos ang mao nga insidente ug gibana-banang anaa sa 70,000 kapin kon kulang .
Walay natala nga nasamdan ko kaha namatay sa mao nga sunog.
Giklaro usab si City Fire Marshal Villaroya nga adunay sulod nga tubig ang ni-respondeng fire truck sukwahi sa nikatag nga taho sa social media.
Gikadismaya usab niini ang mga nagpakatag sa sayop nga impormasyon.
Samtang padayon usab nga gi-imbestigahan karon ang insidente sa sunog nga nahitabo ala 1 kapin usab sa hapon kagahapong adlaw sa P7, Brgy. Casisang, ning dakbayan.
Ang nasunog mao ang store room nga iya sa DEPED Malaybalay City Division.
Nagbilin kini sa 8,400 pesos nga estimated damage.
Nagtoo usab ang city fire marshal nga gituyo kini ug sunog subay sa ilang inisyal nga imbestigasyon.
Sa karon nagpadayon ang gihimong imbestigasyon sa duha ka mga insidente sa sunog.
