Patay ang duha ka persona nga target sa implementasyon sang search warrant sang gintingob nga pwersa sang Regional Intelligence Unit-12, Regional Mobile Force Batallion-12, Polomolok Municipal Police station, SCPMFC-SCPPO, 10th SFC 5TH SF BN PA, alas 3:40 kahapon sang aga, Hunyo 6,2021.
Kaso nga pagbayolar sa RA 10591/ Comprehensive Firearms and Ammunition Regulation Act ang ginapangatubang nga kaso nanday Emilton Abedin Ampatuan alias “Meliton Ampatuan”., 45y/o kag Abdullah Sampulna Ampatuan pareho residente sang Sitio Lagwang Purok 5, Brgy. Rubber, Polomolok, South Cotabato kag mga supporters suno pa sang“Daesh/Da’ish Group.
Suno pa sang namutikan sang mga target ang presensya sang implementing police officers gintiro sang mga ini kabangdanan sang firefight.
May-angot sini, nakaangkon sang igo sang bala ang mga suspek nga gilayon man nga gindala sa ospital, apang gindeklarar nga dead on arrival sang attending Physician.
Narekober naman sa lugar ang isa ka unit sang caliber 45 sub-machine pistol nga may isa ka magazine loaded sang cal.45 live ammunition, 3 ka basyo sang cal .45, 1 ka unit sang cal.357 MAG revolver, cal.38 SPL fired cartridge case kag anum ka 9mm fired cartridge cases.
Samtang nakuha naman sa puluy-an sang target ang 2 ka unit sang wala nahibaluan nga klase sang homemade rifle, 1 ka unit sang ginaaligar riffle grenade kag isa ka panid sang ISIS flag color black.
