General Santos City–Anaa na sa kustudiya sa Tupi PNP ang duha ka mga suspek sa pagpatay sa biktimang si Nerio Engo Cutay, 25, single, laborer ug residente sa Sitio Tucalabong, Barangay Crossing Rubber, Tupi, South Cotabato.
Nasayran nga una nang misurender ang duha ka mga suspetsado nga silang si Jerson Gapa Palimac, 37 anyos ug Malindo Para, 22 anyos, susamang nanimuyo sa Purok Doldol, Barangay Calpidong, Glan, Sarangani Province ngadto na sa Glan PNP diin miangkon ang mga nasampit nga ilang nipatay si Cutay pinaagi sa pagdunggab.
Sumala ni Police Lt. Col. Neil Wadingan, Hepe sa Glan PNP nga nagtrabaho sa Tupi ang duha ka suspek ug dihang ilang nahimo ang krimen sila misibat padulong sa Glan apan misurender human nga namaymayan sa ilang mga opisyal sa Barangay ug mga kabanay.
Gikumperma usab ni Police Lt. Col. Neil Wadingan nga basi sa ilang pakighinabi ngadto sa duha ka mga suspek, nga aduna na silay daang bangi ang biktimang si Nerio Cutay.
Dihang nagtagbo ang ilang dalan didto sa Tupi, didto na nahitabo ang kumusyon nga misangko sa pagpatay.
Kahinumduman nga una nang nakaplagan ang patayng lawas sa biktima sa Purok 7, Barangay Crossing Rubber, Tupi, South Cotabato niadtong Enero 21 sa buntag./ nakaplagan kini sa usa ka concern citizen kansa napuno matud pa ug samad dinunggaban ang lawas niini.
