Davao City – Patay alas-4:00 Martes sa kaadlawon, Pebrero 26, human giingong nisukol sa mga awtoridad ang duha ka mga anaa sa listahan ni PRRD nga mga drug suspects nga nalambigit sa illegal drug trade dinhi sa dakbayan.
Sa pagpanguna sa Regional Mobile Force Batallion XI uban ang Regional Police Drug Enforcement Unit XI ug kapulisan sa Buhangin giimplementa batok sa lima ka targets ang upat ka mga search warrants nga giisyu ni Executive Judge Emmanuel Carpio.
Sa interbyu sa RMN Davao kang Police Regional Office XI Spokesperson PCI Jason Baria nga unang gikasa sa mga awtoridad ang operasyon sa may St. Jude, Buhangin, Davao City batok kang Noel Segovia apan inay musumite sa mga kapulisan namusil kini hinungdan nga nibalos na ang mga operatiba.
Gidala pa kini sa SPMC apan gideklarang na kining dead on arrival sa mga doktor.
Narekober sa posisyon niini ang .45 nga baril, M-16 rifle, mga bala ug P10,000 kantidad sa shabu.
Samtang patay usab ang laing suspek nga si Roy Monleon human giingong nisukol sa mga otoridad sa may Purok Mahayag, Buhangin, Davao City.
Narekober sulod sa panimalay sa suspek ang .38 nga pusil, mga bala ug shabu nga nagkantidad og P12,000.
Sa ikatulong operasyon gisilbi ngadto sa Tibay Brothers nga taga Amakan Cabantian ug naaresto ang suspek nga si Edwin Tibay apan nakaikyas ang igsuon niining si Edmond Tibay.
Nagkantidad sa P15,000 nga shabu ug mga drug paraphernalias ang nakuha usab sa maong suspek.
Sa operasyon sa mga otoridad didto sa Esperanza, Cabantian, Davao City nakaikyas usab ang target nga si Mon Jacob Catubig.
Negatibo usab ang panimalay sa suspek sa paglapas sa RA 9165.
Musumada sa P37,000 sa shabu ang nasakmit atol sa nasangpit nga mga operasyon.
Sumala ni Baria nga kasong may palapas sa RA 9165 ang gipasang-at na sa suspek nga si Tibay.
RadyoMaN Aimee Guinita
