KABANKALAN CITY, NEGROS OCCIDENTAL – Duha ang kumpirmado nga nagkalamatay samtang duha ka iban pa ang nasamaran matapos ginsulod sang mga gina-allege katapo sang New People’s Army ang Peace and Development Community Site sang RPA/ABB sa Purok Mambinay, Brgy. Locotan, Kabankalan City may mga la 1:15 sini gid lamang nga kaagahon.
Ang mga nagkalamatay ginkilala nga sanday Jhonel Marbebe, 23 anyos, residente sang Sitio Mambinay kag Bogie Vergara, 59 anyos, pumuluyo sang Sitio Ilan, tanan sang Brgy. Locotan, Kabankalan City.
Nakilala naman ang mga nasamaran nga amo sanday Jonathan Pragados, 42 anyos, pumuluyo sang Purok Acacia, Brgy. Tabugon, Kabankalan kag si Ranel Banista, 18 anyos sang Sitio Ilan,Brgy. Locotan.
Wala labot sini, may lima pa gid sila ka mga kaupdanan nga nakatigayon nga makapalagyo kag naluwas.
Ini sila ginkilala nga sanday Regalado Bunda, Ben Baliguat, Andres Montihon, Jojie Siplao kag Franco Vergara.
Suno sa imbestigasyon, nagakatulog ang mga biktima kag tuman ka dulum bangud nga brown-out sang ini sila ang ginlusob sang mga armado nga kalalakihan.
Ginpahayag nga ang mga biktima amo ang nagabantay sa sini nga site kon diin may nabilin pa nga olobrahon.
Natigayon nga makuha sang mga suspek ang 7 tanan ka mga matag-as nga kalibre sang armas sang mga biktima.
Nahibaluan nga ang Peace and Development Community site ang proyekto nga ginhatag sang provincial government sa mga katapo sang RPA/ABB nga nagbalik na sa sabak sang gobierno.
Sa amo nga community site gintukod ang mga classrooms, day care center kag multi-purpose center para sa sadto mga katapo sang RPA/ABB kon diin ginatawag nila karon ang ila organisasyon nga Kapatiran.
Sa karon padayon ang pursuit operation nga ginpatigayon sang utoridad batuk sa mga suspek nga naghimo sini.
