Patay ang duha ka mga lalaki matapos nga naka-bunggo ang ila salakyan sa nasugata sini nga truck kaina sang aga sa highway sang Brgy. Dancalan sa banwa sang Ilog.
Suno sa record sang Ilog Municipal Police Station ang mga napatay ginkilala nga sanday Michael Castillo, legal ang edad, driver sang mini-truck kag ang iya helper nga si Nico Alum, 18 anyos.
Base sa imbestigasyon sang pulis, ang salakyan nga gina maneho ni Castillo ang may karga nga isda halin sa banwa sang Hinobaan kag igabaligya kuntani sa Kabankalan City.
Apang sa pag-abot sa highway sang Brgy. Dancalan, naglupok ang tuo nga goma sa likod sang salakyan sang mga biktima rason nga nadulaan ini sang kontrol sang manubela, naglapaw sa pihak nga lane kag nakabunggo sa pasugta nga truck.
Pahayag sang pulis nga bangud sang impact sang pagkabunggo, dead on the spot ang duha ka mga biktima samtang gilayon naman nga nagsungka ang driver sang truck.
[image: image.png]
