Giila ang mga namatay nga sila Bonifacio Palluto, 58 anyos, minyo, drayber sa Rusi single motor, ug pag-umangkon niini nga si Hannah Cate Signocan, 7 anyos, estudyante, ug pulos mulopyo sa Purok-5, Barangay Kibangay, Lantapan, Bukidnon.
Sumala sa taho sa kapulisan, nga gadagan sa Sayre Highway ang maong motorsiklo nga gimaneho ni Palluto gikan sa Lantapan, Bukidnon ug padulong sa Barangay Dalwangan, Malaybalay City sa dihang pag-abot sa lugar nadisgrasyahan, miliku pawala ang motorsiklo padulong sa gasoline station sa maong lugar apan wala kini mabantayi sa katabo nga Hyundai Reina nga sakyanan og nabanggaan niini ang motorsiklo.
Gumikan sa impak, nakaangkon og nagkadaiyang samad ug injury sa kalawasan ang duha ka sakay sa maong motor nga daling girespondihan sa mga personahe sa Malaybalay City Emergency Response Unit (MERU) apan gideklara na nga dead-on-arrival sa balay-tambalanan ang drayber sa maong motor. Samtang pasado alas 6 na sa gabie kagahapon nga gideklarang patay na usab ang angkas sa motorsiklo nga pag-umangkon sa drayber nga biktima.
