Davao City – Duha ang patay sa sakop sa New People’s Army sa nahitabong engkwentro kagahapon sa buntag tali kasundaluhan ug teroristang NPA sa Sitio Caceras, Barangay Upper Bala, Magsaysay, Davao del Sur.
Sa pakighinabi sa DXDC RMN Davao kang Lieutenant Colonel Rhojun Rosales, 39 th Infantry Battalion Commander, nag-kaengkwentro matud pa ang 39th IB ug rebeldeng grupo bandang alas 11:30 sa buntag.
Dugang ni Rosales nga gibana-banaang anaa sa kapin kun kulang 30 ka mga miyembro sa NPA ang naengkwentro sa kasundaluhan diin milungtad og usa ka oras ang binayloay sa bala resulta sa pagkamatay sa duha ka wala pa mailhing NPA ug pagrekober sa duha ka m16 rifles.
Gibutyag usab sa commander nga walay napagan sa tropa sa gobyerno.
Dugang niini, giklaro ni Commander Rosales nga walay nahitabong pagbakwit sa nasangpit nga lugar diin sumala niya layo ra sa mga residente ang nasangpit nga encounter site.
Samtang nanawagan karon si 1002 Brigade Commander, Brigadier General Roberto Ancan ngadto sa mga teroristang NPA nga musurrender na og pahimuslan ang mga programang gitanyag sa gobyerno alang kanila.
RadyoMaN Renz Barbarona
