Duha patay sa managlahing shooting incident sa Tagum

Davao City – Parehong gideklara nga dead on arrival ang duha ka mga lalaki nga pulos gipamusil sa managlaing shooting incident nga nahitabo kagahapong adlawa, Hunyo 11, 2018 sa Tagum City.

Sa record sa PRO-XI, unang biktima naila nga si Wendrel Lazaga, kinsa samtang naglingkod sa usa ka booth nga nahimutang sa National Highway, Crossing Timog Avenue, Brgy. Visayan Village kalit kini gipusil alas 11:00 sa buntag sa wala mailhing suspetsado diin narekober ang duha ka bala ug upat ka basiyo sa fired cartridge sa gituohang .45 kalibre sa pistola.

Samtang patay usab ang usa ka giilang si Kim J Mark Lamintao, 26 anyos, security guard sa LYR Security Agency kinsa gipusil alas 2:52 sa hapon sa may Gas Island Gasoline Station, Purok Sampaguita Manga, Brgy. Visayan Village, Tagum City.


Sa inisyal nga imbestigasyon migula nga kalit gipusil sa wala mailhing suspetsado si Lamintao samtang nagduty diin naigo sa wala nga bahin sa iyang dughan ug narekober ang usa ka basiyo sa gipabutong bala nga gituohang gikan sa .45 nga kalibre sa pistola.

Ang duha human sa insidente parehong gitabang sa Tagum CDRRMO paingon sa Davao Regional Medical Center apan pulos gideklarang dead on arrival sa mga doktor.

Padayon pang ginasuta sa kapulisan ang motibo sa pagpusil-patay sa duha ka mga lalaki.

RadyoMaN Jason Amisola

Facebook Comments