General Santos City— Patay ang duha ka lalaki human kining gipamusil sa duha ka mga suspetsado gamit ang caliber 45 nga armas alas 11 pasado ang takna sa buntag mikabay’ng adlaw abril uno sa may Blk. 8, Prk 20, Brgy. Fatima ning dakbayan.
Ang mga biktima nailang sila si Jessie Mondarez Asuque, alyas Jec-Jec, 21 anyos nga residente sa nasangpit nga lugar kung asa kini ang gidaling gidala sa balay tambalanan apan gideklarang dead on arrival.
Samtang ang laing biktima nailang si Beng-Beng Lauron alyas Jawar, hamtong ang pangidaron nga residente sa Prk. Lote, Brgy. Calumpang ning dakbayan.
Basi sa inisyal nga imbestigasyon sa kapulisan, nag-inom ang mga biktima sulod mismo sa panimalay sa biktimang si Asuque kung asa kalit lang matud pang misulod ang duha ka suspek ug dayon gipamusil ang mga nahisgutan ug misibat palayo sa lugar nga nagbaktas.
Sumala pa nga si Jawar ang lambigit sa managlahing riot sa area sa Police Station 5. Narekober sa crime scene ang upat ka mga empty shell sa caliber 45 nga armas. sa karon, padayon ang ginahimong pursuit operation batok sa mga suspek kung asa ginasuta pa kung unsay motibo sa maong pagpamusil.
