General Santos City—Duha ang patay sa sunod-sunod nga buy-bust operation sa kapulisan sa Gensan.
Ala 1:45 ang takna sa hapon, kagahapong adlawa, unang gipahigayon ang buybust operation sa may Royeca Road, Barangay Bula, Gensan kung asa target sa operasyon ang usa ka Razzel De Guzman, legal age, residente sa Purok Palen, Barangay Labangal, Gensan.
Napalitan ug usa ka sachet sa gituohang shabu ang suspek gamit ang P500.00 nga maked money. Apan nakamatikod ang suspek nga Police ang iyang katransaksyon, kalit kining mibunlot ug. 38 revolver dayon gipabuthan ang tropa sa Police Station 3.
Natigayon pa ang binayluay ug bala ayha naigo ang suspek sa iyang lawas nga hinungdan sa iyang kamatayon. Gawas sa usa ka sachet nga napalit sa poseur buyer sa suspek, may napulo (10) pa ka sa sachet sa gikatahapang shabu nga nakumpiska sa posisyon sa suspek.
Alas 3:30 ang takna sa hapon dihang sunod nga gi-operasyonan ang suspek nga si Afren Pano Escolta, 29, Karpentero, residente sa Purok 23, Sunrise Valley, Subdivision, Barangay Lagao, Gensan.
Atol sa operasyon, napalitan ang suspek ug usa ka sachet sa gituohang shabu gamit ang P500.00 nga marked money. Apan dihang nakamatikod nga Police ang iyang nakatransaksyon, misukol kini sa kapulisan mao nga napusilan.
Gidala pa sa Dr. Jorge Royeca Hospital ang suspek apan gideklara kining dead on arrival. Nakuha gikan sa posisyon sa suspek ang usa ka unit sa. 38 revolver ug lima pa ka sachet sa gituohang shabu.
Ang mga suspek ang gikaingong dugay nang ginamonitor sa kapulisan gumikan sa ilang operasyon batok iligal nga droga.
