NEGROS OCCIDENTAL – Duha ka mga tawo ang nabiktima sang pagpanglabo sa separado nga insidente kagab-i kag kaina sang kaagahon sa banwa sang Murcia kag ciudad sang Kabankalan.
Una nga insidente natabo mga las 8 kagab-i sa Brgy. Cansilayan, banwa sang Murcia kon diin nakilala ang biktima nga si Rudy Belegario, 23 anyos ang edad, single kag pumuluyo sang Brgy. Pandanon, Murcia.
Suno sa biktima nga samtang ini siya ang nagalakat agud nga magpauli na kuntani, ini siya ang ginsugata sang wala makilala nga suspek kag hinali na lamang nga ginlabo kag naigo sa iya agtang.
Samtang, sa Kabankalan City naman, biktima sang pagpanglabo si Johnson Saga, 47 anyos, kasado kag pumuluyo sang Brgy. Binicuil, Kabankalan City.
Pahayag sang biktima nga may mga las 12:45 kaina sang kaagahon samtang ini ang nagalakat sa dalan sa ila man lang lugar, ginlambatan ini sang wala makilala nga tawo kag ginlabo.
Nag-angkon sang igo sa iya ulo ang biktima. Lunsay gindala sa Corazon Locsin Montelibano Memorial Regional Hospital ang 2 ka mga biktima./dyHB BACOLOD
