i Balita
December 01, 2019
(Photo from web)
DUHA KA FREELANCE MODEL, NAGREKLAMO SA PULIS MATAPOS NABIKTIMA SANG SCAM
Nagreklamo sa pulis ang duha ka freelance model matapos nabiktima sang scam.
Base sa reklamo sang duha, gintawgan sila sang nagligad nga semana sang nagpakilala nga si Aaron Villabert, empleyado sang Smallville 21 kag gintanyagan nga mag-model sa isa ka car show sa maabot nga Dinagyang.
Bangud ila nakita nga maayo ang offer, nagpasugot man ang mga ini.
Nobyembre 29 liwat nanawag si Villabert sa ila kag ginhambalan nga makigkita kay alyas Daniel nga ila kuno sponsor sa event agud magpirma sang kontrata.
Subong man, natingala sila sang ginhabalan sila ni alyas Daniel nga makadto sa Dragon Lodge para sa contract signing.
Apisar sini nagsugot man sila kag nagsulod sa Lodge kag didto ginapapirma sila sa papel nga indi luyag pag-ipabasa ni alyas Daniel.
Dugang pa nga natingala sila nga gin-isyuhan sila sang tseke sang isa ka bangko nga nahuman lamang sa photo paper.
Labi pa gid sila nga naakig sang ginhambalan sila ni alyas Daniel kon sin-o sa ila nga duha ang magaserbe nga escort service sini.
Bangud sini, nag-angal kag nagareklampo ang isa sa duha ka model kabangdanan napilitan ang lalaki nga maguwa na lang sa lodging house.
Sa karon , indi na ma-contact si Villabert nga nagpakilala nga empleyado sang Smallville 21 Hotel kag ila natukiban nga indi matuod nga naga-obra ini sa nasambit nga hotel.
Bangud sa insidente, ginpablotter sang duha ang natabu kag nagapaandam sa iban nga kababainhan nga indi basta-basta magsalig kon may mag-offer sang kasubong nga oportunidad kay basi masiod man sa bitag kag magabutang sang ila kabuhi sa peligro.
