BACOLOD CITY – (2nd Update) Safe na ang mga biktima sang vehicular accident kahapon sa Bacolod Circumferential Road sa atubang sang Valley of Peace sa area sang Brgy. Mandalagan, syudad sang Bacolod.
Natumba ang dump truck nga may karga sang balas samtang nawasak naman ang uluhan nga bahin sang isa ka Toyota van matapos nga bunggu-anay.
Pilason ang driver sang van nga nakilala sa kay Nathaniel Todnera, 64 anyus, residente sang Brgy. 28, Bacolod City.
Upod ni Todnera ang iya asawa apang de-buenas nga wala ini nasamaran.
Samtang, pilason man ang driver sang dumptruk nga si Rene Quinto, 33 anyus, residente sang Hda. Kulahaw, Brgy E-Lopez, syudad sang Silay.
Kaupod ni Quinto, ang iya helper nga si Orland Alamo, 17 anyus.
Ang dump-truck ang naghalin sa Bago City kag may e-deliver kuntani nga balas sa syudad sang Talisay sang natabu ang aksidente.
Sa imbestigasyon sang Police Station 3, naglapaw sang linya sang dump-truck ang van nga amon ang rason sang ila pagbunggu-anay.
Samtang, nagtabog naman ang guma sang dump-truck sa pihak nga bahin sang dalan kag nag-igo naman sa isa ka panel van.
Bangud man sa impact sang bunggu-anay, na-atrasan naman sang van ang naga-sunod sa iya isa ka Fuego pick-up.
