SARANGANI PROVINCE— Dako ang pagdayig sa monitoring team sa E-CLIP kon Enhanced Comprehensive Local Integration Program sa DILG Central Office ug sa DILG Regional Office 12 sa gipatuman nga E-CLIP sa probinsya sa Sarangani.
Segun ni Mr. Reynaldo Cusi ilalum sa opisina sa DILG National Barangay Operations Office, nailhan na ang E-CLIP sa Sarangani Province nga adunay best practices gikan pa kaniadto nga CLIP pa lang kini dili pa E-CLIP, kauban ang kasundaluhan og kapulisan. Hinungdan nga nahimo na matud pa nilang resource speaker si Ms. Lizet Lopez, ang E-CLIP focal person sa PSWDO Sarangani, aron muhatag og mga lecture ug presentasyon sa experience sa Sarangani ngadto sa ubang mga rehiyon sa Pilipinas.
Samtang, si Governor Steve Chiongbian Solon ang todo-suporta usab matud pa sa ilang mga kalihukan. Gagahin matud pag oras ang Gobernador sa E-CLIP timaan sa iyang seryoso nga intensyon nga matabangan ang mga kanhing rebelde nga mupuyo nang malinawon kauban ang ilang mga pamilya. Sa ilang nationwide program review sa E-CLIP, anaa matud pa gatambong si Governor Solon didto sa kauluhang Maynila aron munindot pa ang pagpatuman sa programa.
Anaa si Cusi kagahapon sa Kapitolyo sa Sarangani aron pangunahan ang pag-inspeksyon sa Halfway House una kini pormal nga ma-abrihan karong tuiga.
Ang halfway house ang temporaryong kapuy-an sa mga buot nang mu-surender sa gobyerno, nahimutang kini sa Barangay Maribulan, Alabel. Nihatag og Singko Milyones (P5M) nga pondo ang DILG aron mutindog ang halfway house nga gilangkuban sa lima (5) ka building sama sa mess hall, lawak sa mga kalalakihan, lawak usab sa mga kababaihan, conjugal room, ug admin hall.
Samtang, ang Sulong Kapayapaan program kauban sila Vice Governor Elmer De Peralta ug mga board member ang nipalit og yuta aron katindugan sa maong mga gambalay apil na ang perimeter fence og ang mga kagamitan sa sulod.
Si Muhammad Nanding Jr., ang focal person sa E-CLIP Region 12, ang nakadayig usab sa pagdumala ni Governor Solon. Daghan matud pang programa ang Gobernador alang sa peace and order. Wala lang matud pa gahulat si Governor Solon sa unsay ihatag sa nasyonal nga gobyerno kundili may inisyatibo kini aron paspas mapatuman ang mga programa ug aktibidad nga dakong ikaayo sa katawhan.
Sa bahin ni Governor Solon, gibutyag niini atol sa interview kaniya sa mga media, nga padayon ang ilang pag-awhag nga mukanaog na. Iya matud pang gi-respeto ang ilang gibarugan apan parehas matud pa silag tumong ug katuyuan nga matabangan ang mga lumulupyo sa pag-angkon og kaharuhay sa panginabuhi, maong padayong naka-sentro ang mga programa og proyekto sa lokal nga panggamhanan sa kabukiran.
Naglaum ang Gobernador kauban sila Senador Manny ug Congressman Ruel Pacquiao nga matapos na ang mga kalihukan hilabi na nga giabrihan ni Pangulong Rodrigo Duterte ang localized peace talk.
Daghan na matud pang nikanaog, gani daghan matud pa kanila ang nakatrabaho isip mga myembro sa CAFGU ug kadaghanan ang maayo nag kahimtang. Dili matud pa angayan nga kita rang mga Pilipino ang gaunay sa pakig-gyera.
