Ang Cebu City Government ug ubang stakeholders niawhag sa publiko nga moapil sa mga nagkadaiyang kalihokan para sa selebrasyon sa Earth Hour karong Sabado, Marso 24.
Si Nida Cabrera, head sa City Environment and Natural Resources Office (CCENRO) niingon nga ang Cebu City nag-selebrar sa global initiative kun Earth Hour niadtong 2010 pa.
Sa imong pagpalong sa mga suga sa imong lawak gikan 8:30 ngadto sa 9:30 sa gabie, nag-promote ka og low-carbon lifestyle ug nakatabang ka sa pagsalbar sa atong Mother Earth.
Aduna puy laing mga eco-based nga kalihokan karong Sabado gikan sa 1 sa hapon ngadto na sa 10 sa gabie sa Plaza Independencia.
Mga trainings ug presentations on sustainable eco-friendly practices gamit ang Eco Bricks ug solar technology, ug uban pa maoy ma-expect sa publiko karong Sabado.
Dugang ni Cabrera nga ang eco bricks gamiton sa CCENRO para paninduton ang Butuanon River. Ang eco brick, usa ka plastic bottle nga giputos og maayo nga adunay ginamit, limpyo ug uga nga plastic para makahimo og building block nga magamit sa dugay’ng panahon.
Human sa pagpalong sa mga suga inig gabie, mosunod ang bike race ug marathon og kini open sa publiko.
Para sa mga runners, adunay laing kalihokan para nila nga gitawag og “Basura Run” nga mahitabo dungan sa bike race. Gitawag siya og Basura Run kay samtang nagdagan ang mga participants, mamunit sila og mga basura.
Adunay bana-bana nga 100 ka mga barangay environmental officers ang mag-atang sa maong kalihokan karong Sabado para masuta kung gi-apply ba sa mga participants ang ilang nakat-unan nga proper waste management.
