Elanto: ‘Balik-‘Pinas’ lisud nga option

13

Davao City – Dili gayud nato mapugos ang mga Overseas Filipino Workers (OFWs) sa Middle East nga mopauli na dinhi sa Pilipinas bisan pa man kon dili ikalilong nga grabe na mga insidente sa pagpang-abuso nga ginahimo sa mga agalong Arabo ingon man ang padayong pag-ulbo sa kagubot sama sa gyera or bangi sa mga nasud nga Estados Unidos ug Iran.

Matud ni Mindanao Migrants Center for Empowering Actions Executive Director Inorisa Elanto, lisod kaayong agnihon ang mga OFWs nga biyaan ang ilang trabaho abroad ug mubalik na lamang dinhi sa nasud aron makalikay sa dugang pang mga pagmaltrato sa mga langyaw’ng agalon ug pagka-ipit sa pag-ulbo sa giyera sa naasoy nga mga rehiyon nunot sa bikil karon sa America ug sa Iran.


Nasayod ang mga OFWs nga delikado sa Middle East nunot sa balasubas nga tratamiyento sa mga Arabo ngadto sa mga Pinay workers ilabi na domestic helpers nga maoy sagad mabiktima sa pagpangdagmal ug pagpanglugos diin ang uban patay nang mahiuli sa ilang tagsatagsa ka mga pamilya dinhi sa Pilipinas, dugang ni Elanto.

Luyo sa dobleng pasakit, ang mga OFWs nasayud nga pag-abot dinhi sa Pilipinas, wala sila’y mapaabot nga klarong trabaho ug kun aduna man, dyutay ra usab ang sweldo matag bulan hinungdan nga malagmit mas pilion pa nila ang pagsakripisyo sa pagpanarbaho sa ubang mga nasud basta makasuporta ug makapadala lamang sila’g igong kwarta sa ilang mga pamilya dinhi sa Pilipinas, matud sa OFW advocate.

Segun ni Elanto nga kun panghingusgan gayud sa gobyerno ang pagpahigayon og repatriation alang sa mga OFWs, siguradong walay mahimo ang mga trabahanteng Pilipino sa ilang pagdumili karon nga nagpadayon pa ang tensyon didtong dapita sa kalibutan.

Sugyot ni Elanto, angay susihon sa mga barangay officials kung kinsa sa ilang mga residente ang nag-adto ug nagtrabaho abroad aron makahatag sila og mga pangalan sa nasudnong gobyerno niadtong mga OFWs nga legal ug iligal nga misulod sa pipila ka mga kanasuran.

Dugang pa sa maong organisasyon nga nagpahigayon usab sila og pag-edukar sa mga pamilya sa mga OFWs kalabot sa kahimtang sa ilang mga minahal sa kinabuhi nga nanarbaho sa mga Islamic countries pamasin nga matandog sila ug musugot na lamang nga papaulion dinhi sa nasud ang ilang mga kabanay nga atua karon sa delikadong mga dapit samtang dili pa ulahi ang tanan.

RadyoMan Joel Viray

Facebook Comments