Davao City- Gidala na sa hospital sa dakbayan sa Digos ang driver sa puti nga elf truck nga adunay plate number nga ABK 5920 human kini nadisgrasya kaganinang 1:30 sa hapon sa Brgy. Binaton Davao del Sur.
Sa interbyu sa DXDC Rmn Davao kang Jun Gatsumbo ang usa sa nag rescue sumala pa ang driver nga si Jona Damaso nga taga-Brgy Kapatagan nakaangkon og samad ug bun-og sa nagkadaiyang parte sa lawas.
Matud pa ni Gatsumbo nga samtang naglawig ang maong trak nga adunay kargang 70 ka sako nga patatas padulong og Cagayan apan pag-abot sa nasangpit nga barangay kalit kining nawad-an og preno.
Niambak matud pa ang drayber niadtong tungora.
Samtang ang karelibo nga drayber nga giila usab nga si Daryl maoy nimaniobra sa manebela hinungdan nga nahulog kini sa kanal.
Swerte tungod wala maangol ang maong drayber.
Sa pagkakaron padayon nga gitambalan sa Digos Doctors’ Hospital ang drayber nga si Damaso ug gina-obserbahan pa ang kahimtang niini.
RadyoMaN Don Pulayao
