Ni Alfonso T. Ruda
Gimanduan ni Mr. James Jeraldy Balingit, ang Municipal Local Government Operations Officer sa Polanco ang mga Punong Barangay nga motambong sa emergency meeting nga gipatawag ni Mayor Evan Hope Olvis karong buntag uban sa ilang mga Health Workers.
Tukion sa maong tigom ang tukmang lakang nga himoon sa kagamhanang-Lokal sa Polanco batok sa gikahadlokang 2019 Novel Coronavirus ug ang papel sa mga kapitan ug barangay health workers aron malikayan ang pagsulod sa maong balatian sa lungsod.
Lakip sa gilaumang motambong ang Municipal Risk Reduction and Management Officer, Municipal Planning and Development Officer, MSWDO, RHU, DILG, PNP, ug uban pang mga emergency responders.
Ang maong tigom gipatawag ni Mayor Olvis human nga nadawat ang DILG Memorandum Circular No. 2020-018 nga pinitsahan ug Enero 31, 2020 gikan sa rehiyonal nga buhatan sa DILG-9 may kalabutan sa mga lakang ng himoon batok sa Coronavirus, human usab nakigmiting si Mayor Olvis sa mga kadagkuan sa mga nagkalain-laing buhatan sa lungsod may kalabutan niini.
Lakip sa gilaumang tukion ang pagpasabot sa mga punong barangay ug mga health workers sa tukmang impormasyon, kabahin sa 2019 Novel Coronavirus.
Tumong usab sa miting nga mare-activate ang Barangay Health Emergency Response Team aron magmonitor kondisyon sa panglawas sa mga residente sa barangay ug motaho ngadto RHU Polanco sa unsa mang ilang mamatikdan sa ilang barangay alang sa tukmang lakang nga himoon batok niini.
