General Santos City—samad ug bun-og sa lawas ang naangkon sa usa ka empleyado sa gobyerno nga apil napahigayon ug clearing operation sa mga tricycle nga iligal naghimo ug terminal sa mga kadalanan human kining gituyo nga ligsan sa usa ka tricycle driver sa may entrance nga bahin sa Bulaong Terminal ning dakbayan sa Gensan.
Biktima giilang si Romel Polo, nagtrabaho ilawom sa City Administrator’s Office ug residenti ning syudad.
Alas 11:00 ang takna sa buntag kagahapong adlawa, August 29, 2017 samtang naghimo sa ilang trabaho ang biktima uban ang iyang mga kaubanan sa may Bulaong Terminal, iyang gisita ang driver nga si Alvin Almeria kansa nag standby matud pa sa entrada nga bahin sa maong terminal.
Tungod gibawal ang mga tricycle sa entrada gyud sa terminal gisita kini sa biktima nga mudistansya lang apan inay musunod sa mando, nakiglalis nuon ngadto sa biktima ang suspek.
Tungod niini nidako ang ilang away hangtud nga gipadagan sa suspek ang iyang tricycle dayon giligsan ang biktima.
Samad ug bun-og sa nagkandaiyang parti sa lawas ang naangkon sa biktima kansa gidala gilayon sa ospital aron mapailawom sa medikasyon. Samtang suspek paspas nga misibat human sa insidenti apan iyang gibilin ang iyang tricycle.
Sa karon padayon pang gipangita sa kapulisan sa Police Station 1 ang driver nga si Almeria aron patubagon ang salaod nga iyang gihimo.
